کراچی:پاکستان کے سمندری علاقے میں تمام سٹیک ہولڈرز کے ذریعے سیکورٹی کے موجودہ طریقہ کار کو جانچنے کے لئے مشق سی گارڈ2025کل شروع ہوگا، سمندری مشق کا اختتام 28فروری کوہوگا۔
بحری مشق سی گارڈ کا انعقاد پہلی مرتبہ سن 2024میں کیا گیا جس میں 50سے زائد ملکی سٹیک ہولڈرنے حصہ لیاتھا ،مشق مشترکہ آپریشنز کی صلاحیتوں کو بہتر بنانے اورمیری ٹائم سیکورٹی کو درپیش نئے چیلنجز سے نبرد آزما ہونے کے لئے ایک سنگ میل کے طورپر استعمال ہوگی۔
مشق سی گارڈ کے موقع پر کمانڈر کوسٹ رئیرایڈمرل فیصل امین نے کہاکہ پاکستان کی ایک ہزار کلومیٹر سے زیادہ ساحلی پٹی بیش بہا قدرتی وسائل سے مالامال ہے، قدرتی وسائل کے ساتھ مختلف میری ٹائم چیلنجز بھی جنم لیتے ہیں جن میں غیرقانونی فشنگ، نارکو سمگلنگ، انسانی سمگلنگ، ماحولیاتی تبدیلی وغیرہ شامل ہیں۔
انہوں نے کہاکہ 2013میں جوائنٹ میری ٹائم انفارمیشن اینڈ کوآرڈینیشن سینٹرقائم کیاگیا تاکہ میری ٹائم ڈومین کے تمام اسٹیک ہولڈرز کو ایک پلیٹ فارم فراہم کیا جاسکے۔
