پشاور:گورنر خیبرپختونخوا فیصل کریم کنڈی کا کہنا ہے کہ میں دیکھتا ہوں کیسے صوبائی حکومت زمینداروں سے ٹیکس لیتی ہے، اگر سی ایم سول نافرمانی کا اعلان کرسکتا ہے تو ہم صوبائی حکومت کے ایسے اقدامات پر سول نافرمانی کا اعلان کرسکتے ہیں۔
پشاور میں کسان کنونشن سے خطاب کرتے ہوئے گورنر خیبرپختونخوا فیصل کریم کنڈی کا کہنا تھا کہ صوبائی حکومت نے فیصلہ کیا ہے کہ اس صوبے کو تباہ کرنا ہے، صوبائی حکومت صوبائی حقوق کی جنگ نہیں لڑ رہی، معاہدوں کے تحت دیگرصوبوں میں نہریں بن گئیں ہمارے صوبے میں نہیں بنی۔
گورنر خیبرپختونخواکا کہنا تھا کہ رواں سال چشمہ رائٹ بینک کینال کو شروع کریں گے۔یہ اسلام آباد میں دھرنا دے کر پتلی گلی سے نکلتے تھے، ہم بھی زمینداروں کے ساتھ دھرنا دے سکتے ہیں۔ فیصل کریم کنڈی کا کہنا تھا کہ خیبر پختونخوا کی 34 میں سے24یونیورسٹیز میں وائس چانسلر نہیں ہیں۔ سب سے زیادہ لوڈشیڈنگ ہمارے صوبے میں ہو رہی ہے۔
دریں اثناء اپنے بیان میںگورنر خیبرپختونخوا فیصل کریم کنڈی نے کہاکہ سانحہ 9 مئی کے مرکزی کردار کے نام پر اسٹیڈیم کا نام رکھنا ریاست دشمن قوتوں کو تقویت دینا ہے۔فیصل کریم کنڈی نے کہا کہ ارباب نیاز اسٹیڈیم کے نام کی تبدیلی انتہائی نامناسب حرکت ہے۔
گزشتہ 9 سال سے اقتدار پر قابض جماعت ارباب نیاز اسٹیڈیم کی تزئین و آرائش اور بحالی تک نہ کرسکی۔فیصل کریم کنڈی نے کہا کہ اسٹیڈیم کا نام صوبے کو دہشتگردوں کے حوالے کرنے والے شخص کے نام پر رکھنا پختونوں کے زخموں پر نمک پاشی ہے۔انہوں نے یہ بھی کہا کہ وزیراعلیٰ صوبے کی شناخت مٹانے اور اسے تباہ کرنے کے مشن پر گامزن ہیں۔
