ٹرین کی ٹکٹ واپسی پر کتنی کٹوتی ہوگی؟نئی پالیسی جاری

کراچی:پاکستان ریلوے نے ٹکٹوں کی نئی پالیسی جاری کر دی ۔حکام کی جانب سے نئی ریفنڈ پالیسی کا اعلان کیا گیا ۔ مسافر پوائنٹ آف سیل سے خریدے گئے ٹکٹ ٹرین روانگی سے 48 گھنٹے قبل تک 90 فی صد رقم واپس لے سکیں گے۔ریلوے ٹکٹوں کی واپسی کی یہ ریفنڈ پالیسی رابطہ ایپ کے ذریعے خریدے گئے ٹکٹوں پر بھی لاگو ہوگی۔ٹرین روانگی سے 24 سے 48 گھنٹے قبل تک 80 فیصد رقم واپس کی جائے گی۔ روانگی سے 24 گھنٹے کے اندر 70 فی صد رقم واپس کی جائے گی۔ ٹرین کی روانگی کے بعد 2 گھنٹوں کے اندر 50 فی صد ریفنڈ دیا جائے گا۔اگر ٹرین 6 گھنٹے یا اس سے زیادہ لیٹ ہو تو مکمل رقم واپس کی جائے گی۔ پوائنٹ آف سیل سے خریدے گئے ٹکٹوں کی واپسی صرف ان ہی کاؤنٹرز پر ہوگی۔ ریفنڈ لینے کے لیے مسافروں کو اصل ٹکٹ اور شناختی کارڈ کی کاپی جمع کرانا ہوگی جس پر انھیں کینسلیشن سلپ اور رقم دی جائے گی۔آن لائن ٹکٹوں کا ریفنڈ صرف اسی آن لائن سروس کے ذریعے ممکن ہوگا جس سے ادائیگی کی گئی ہو۔