لاہور(اسلام ڈیجیٹل)پنجاب میں سب سے بڑی ”کاروبار فنانس اسکیم” کا اجرا کر دیا گیا۔اس موقع پر وزیر اعلیٰ پنجاب مریم نواز نے کہا کہ آسان کاروبار پروگرام کے ذریعے معیشت میں بہتری اور بر آمدات میں اضافہ ممکن ہوسکے گا۔
وزیراعلیٰ پنجاب آسان کاروبار اسکیم کے لیے 84 ارب روپے سے زائد مختص کیے گئے ہیں،آسان کاروبار کارڈ اسکیم کے لیے 48 ارب روپے سے زائد رکھے گئے ہیں، آسان کاروبار فنانس اسکیم کے تحت 36 ارب روپے سے زائد بلا سود قرض فراہم کیا جائے گا۔
آسان کاروبار فنانس اسکیم میں 10 لاکھ سے لے کر 3 کروڑ روپے کے بلا سود قرضے دیے جائیں گے اور قرض 5 سال کی آسان اقساط میں واپس کرنا ہوگا۔آسان کاوربار فنانس اسکیم کے لیے گھر بیٹھے آن لائن درخواست اور تفصیلات کے لیے ویب پورٹل پر اپلائی کیا جا سکتا ہے۔
آسان کاروبار کارڈ اسکیم میں اسٹارٹ اپس اور چھوٹے کاروبار کے لے 10 لاکھ روپے تک کے بلاسود قرض دیے جائیں گے، آسان کاروبار کارڈ کے تحت قرض 3 سال میں آسان اقساط میں ادا کیا جا سکے گا۔
پنجاب کے رہائشی مرد و خواتین، ٹرانسجینڈر اور اسپیشل افراد آسان کاروبار کارڈ کے لیے اپلائی کر سکتے ہیں، آسان کاروبار کارڈ کے لیے خام مال کی خریداری پر وینڈر کو ادائیگی کی جاسکے گی، آسان کاروبار کارڈ کے ذریعے سرکاری فیس، ٹیکس اور یوٹیلٹی بل کی ادائیگی ممکن ہوگی۔
وزیراعلیٰ مریم نواز نے کہا کہ آسان کاروبار کارڈ کے ذریعے25فیصد تک کیش بھی نکلوایا جا سکتا ہے، نوجوانوں کو خود روزگار کی طرف گامزن کرنا چاہتے ہیں، تعلیم کے بعد روزگار کے مواقع فراہم کرنا بھی حکومت کی ذمہ داری ہے۔
پنجاب کا ہر نوجوان معیشت کی بہتری میں آسان کاروبار اسکیم کے ذریعے بھرپور کردار ادا کرے گا۔قرض لینے کے لیے ایکٹیو فائلر ہونا ضروری اور کسی بھی مالیاتی ادارے کا ڈیفالٹر نہ ہونا اہلیت ہے۔
