ترک صدر رجب طیب اردوان نے تصدیق کرتے ہوئے کہا ہے کہ مکہ معاہدے میں مصر کو بھی شامل کیا جا سکتا ہے۔
عرب میڈیا سے گفتگو کرتے ہوئے رجب طیب اردوان نے کہا کہ مصر مستقبل میں ‘مکہ معاہدے’ کا رکن بن سکتا ہے کیونکہ یہ معاہدہ مزید فریقین کی شمولیت کے لیے کھلا ہے۔
ان کا کہنا تھا کہ اس معاہدے کے تحت شریک ممالک کے لیے لازم ہے کہ اگر کسی رکن پر بیرونی حملہ ہو تو وہ اجتماعی طور پر اس کا جواب دیں۔
اس کے علاوہ انہوں نے مزید کہا کہ ہماری تر جیح یورپی یونین نہیں ہے، یورپ وہ ہے جو ناکامی سے دوچار ہوتا ہے۔
انہوں نے آبنائے ہرمز کو دوبارہ کھولنے کی اہمیت پر بھی زور دیا اور کہا کہ اس کی طویل بندش کسی کے مفاد میں نہیں ہے۔
