کراچی:کراچی میں سرد موسم کے آغاز کے ساتھ ہی خسرہ کے کیسوں میں اضافہ ہوگیا۔
ہسپتالوں میں روزانہ درجنوں بچے خسرہ کی علامات کے ساتھ پہنچ رہے ہیں جن میں بخار، کھانسی، نزلہ، آنکھوں کی سرخی اور جسم پر دانے شامل ہیں۔
ماہرین اطفال نے والدین کو خبر دار کردیا کہ خسرہ متاثرہ بچے سے دوسرے بچوں میں تیزی سے پھیلنے والی بیماری ہے،ویکسین نہ لگنے کی صورت میں یہ بیماری نہ صرف نمونیا، دماغی سوزش کا سبب بن سکتی ہے بلکہ جان لیوا ثابت ہوتی ہے۔
ماہرین صحت کے مطابق بچوں میں نزلہ اور کھانسی شدت اختیار کرنے سے نمونیا کی شکل اختیار کر رہا ہے۔ماہر اطفال ڈاکٹر لیاقت علی نے بتایا کہ کراچی میں سردی کی شدت میں اضافے کے ساتھ ہی خسرہ کے کیسوں میں اضافہ ہوگیا ہے۔
ہسپتالوں میں یومیہ درجنوں مریض خسرہ کی علامات کے ساتھ ہسپتال آرہے ہیں،خسرہ کی علامات میں نزلہ کھانسی اور بخار کے ساتھ سرخ آنکھیں اور منہ میں چھالے شامل ہیں،خسرہ میں چہرے اور جسم پر دانوں کا سبب بنتا ہے۔
خسرہ زیادہ تر پانچ سال سے کم عمر بچوں میں ہوتا ہے۔خسرہ سے بچاؤ کے لیے ای پی آئی مفت دو ڈوزز کی ویکسین فراہم کرتا ہے جبکہ خسرہ سے بچاؤ کی ویکسین نو ماہ اور ڈیڑھ سال کی عمر میں لگائی جاتی ہیں،ویکسین کے باوجود خسرہ ہوسکتا ہے لیکن وہ شدت نہیں ہوتی۔
