صارفین ہو جائیں تیار، ملک بھر میں گیس مہنگی کرنے کی درخواستیں آگئیں

اسلام آباد : ملک بھر کے گیس صارفین کیلئے بری خبر آگئی۔ گیس کمپنیوں نے مالی سال 2025، 26 کیلئے گیس مہنگی کرنے کی درخواستیں دے دیں۔ اوگرا نے سماعت کیلئے تاریخیں بھی مقرر کردی ہیں۔
آئل اینڈ گیس ریگولیٹری اتھارٹی میں سوئی نادرن کی درخواست پر 7 نومبر اور سوئی سدرن کی درخواست پر 11 نومبر کو سماعت ہوگی۔ سوئی نادرن نے گیس 189 روپے فی ایم ایم بی ٹی یو اور سوئی سدرن نے گیس 125 روپے 41پیسے فی ایم ایم بی ٹی یومہنگی کرنے کی درخواست کی ہے ۔
درخواست میں رواں مالی سال کیلئے ضرویات کا تخمینہ 52 ارب 95 کروڑ روپے اور ایل پی جی ائیرمکس منصوبے کی سبسڈی کی مد میں 58 کروڑ 20 لاکھ روپے شارٹ فال کا تخمینہ لگایا گیا ہے۔ سوئی سدرن نے اپنی درخواست میں گیس 125 روپے 41 پیسے مہنگی کرکے اوسط مقررہ قیمت 1658 روپے 56 پیسے فی ایم ایم بی ٹی یو کرنے کی درخواست کی ہے۔
درخواست میں رواں مالی سال کیلئے مالی ضروریات کا تخمینہ 24 ارب سے زاید لگایا گیا ہے جبکہ گزشتہ برسوں کے خسارے کی مد میں 34 ارب 25 کروڑ روپے وصولی کی درخواست کی گئی ہے۔