آئل ٹینکرز نے ہڑتال کی دھمکی دے دی، پٹرول کے بحران کا خدشہ

کراچی : آئل ٹینکر کنٹریکٹرز ایسوسی ایشن نے ہڑتال کی دھمکی دے دی اور کہا اگر مطالبات نہ مانے گئے تو ملک گیر احتجاج اور سپلائی معطل کرنے کا فیصلہ کیا جائے گا۔
آئل ٹینکر کنٹریکٹرز ایسوسی ایشن نے آئل مارکیٹنگ کمپنیوں کے خلاف ہڑتال کی دھمکی دیتے ہوئے کہا ہے کہ اگر مسائل حل نہ کیے گئے تو احتجاج اور ہڑتال پر مجبور ہو جائیں گے۔ایسوسی ایشن کے رہنماؤں کا کہنا تھا کہ آٹومیشن نظام تمام مسائل کی جڑ ہے، جس کے ذریعے چوری اور بدعنوانی ہو رہی ہے۔
عابداللہ آفریدی نے الزام لگایا کہ آئل مارکیٹنگ کمپنیاں کمرشل لوڈنگ کے نام پر کنٹریکٹرز کے ساتھ ناانصافی کر رہی ہیں۔انھوں نے مزید کہا کہ آٹومیشن کے ذریعے مخصوص افراد کو فائدہ پہنچایا جا رہا ہے، جبکہ آئل کنٹریکٹرز سے ایڈوانس ٹیکس پہلے ہی کاٹا جاتا ہے۔
آئل ٹینکر کنٹریکٹرز ایسوسی ایشن نے وزیراعظم اور صدرِ پاکستان سے مطالبہ کیا کہ وہ آئل کمپنیوں کے مبینہ ظلم و زیادتی کا نوٹس لیں اور فوری اصلاحی اقدامات کیے جائیں۔رہنماؤں نے واضح کیا کہ اگر مطالبات نہ مانے گئے تو ملک گیر احتجاج اور سپلائی معطل کرنے کا فیصلہ کیا جائے گا۔