لاہور:وزیر اطلاعات پنجاب عظمیٰ بخاری نے بیان جاری کرتے ہوئے کہاہے کہ پنجاب حکومت نے آٹے کے 10 کلو تھیلے کی قیمت 905 روپے مقرر کر دی ہے۔عظمیٰ بخاری کا کہناتھا کہ 20کلو آٹے کے تھیلے کی قیمت 1810 روپے مقرر کی گئی ہے جبکہ روٹی کی قیمت 14روپے مقرر کی گئی ہے، سیلاب کی آڑمیں قیمتیں بڑھانے کی اجازت نہیں دی جائیگی۔
اس سے قبل وزیراعلیٰ پنجاب کی زیر صدارت خصوصی اجلاس ہوا جس میں گندم ، آٹا اور روٹی کے نرخ برقرار رکھنے کے لئے سخت اقدامات کرنے کا فیصلہ کیا گیا۔فیڈ ملوں میں گندم کے استعمال پر پابندی کا فیصلہ کیا گیا۔ فیڈ ملوں میں گندم کا استعمال روکنے کے لئے دفعہ144 نافذ کی گئی۔
پیرا کے ایس ڈی اوز کو گندم کی ذخیرہ اندوزی کے سدباب کے لئے خصوصی اختیارات تفویض کرنے کی ہدایت کی گئی۔ پیرا کو گندم کی ذخیرہ اندوزی روکنے کے لئے سخت ترین قانونی کارروائی کا ٹاسک دیا گیا۔
سیلاب کی آڑ میں آٹے اور روٹی کے نرخ بڑھانے والوں کے خلاف ایکشن کی ہدایت کی گئی گندم کی ذخیرہ اندوزی روکنے کے لئے پرائس کنٹرول مجسٹریٹ کو فوری طور پر متحر ک کر دیا گیا۔وزیراعلیٰ نے کہا کہ سیلاب کی آڑ میں آٹے اور روٹی کے نرخ بڑھانے کی ہرگز اجازت نہیں دیں گے، گندم کی ذخیرہ اندوزی عوام سے دشمنی کے مترادف ہے۔
واضح رہے کہ فلور ملز نے سستا آٹا فروخت کرنے سے انکار کیا تھا جس کے بعد صوبائی حکومت نے نئے نرخوں کا اعلان کیا یے۔
