پشاور/ڈی آئی خان:پشاور کے علاقے ریگی للمہ میں سی ٹی ڈی نے فتنہ الخوارج کے خلاف بڑے پیمانے پر آپریشن کیا جس کے دوران 3 دہشت گرد ہلاک ہوگئے۔
سی ٹی ڈی کے حکام کے مطابق ہلاک ہونے والوں میں افغان شہری دہشت گرد عبداللہ عرف جواد بھی شامل ہے، جو دہشت گردی کے متعدد واقعات میں مطلوب تھا۔عبداللہ عرف جواد پشاور میں 18 دہشت گردی کے حملوں میں ملوث تھا جن میں 12 پولیس اور ایف سی اہلکار شہید ہوئے تھے جبکہ کئی دیگر افراد زخمی بھی ہوئے تھے۔
سی ٹی ڈی حکام نے بتایا کہ ہلاک دہشت گردوں کا گروہ پولیس موبائلوں کو نذر آتش کرنے، بھتہ خوری، آئی ای ڈی دھماکوں اور فائرنگ کی وارداتوں میں ملوث تھا،گروہ کا تعلق ٹی ٹی پی سیل سے تھا اور یہ غیر ملکی ہینڈلرز اور فنڈنگ کے ساتھ مزید دہشت گرد حملوں کی منصوبہ بندی کر رہا تھا۔
وزیر داخلہ محسن نقوی نے سی ٹی ڈی کی کامیاب کارروائی پر ان کی تعریف کی اور کہا کہ بھارتی حمایت یافتہ دہشت گردوں کا خاتمہ ایک بڑی کامیابی ہے۔
دوسری جانب ڈیرہ اسمٰعیل خان میں کسٹم اینڈ ایکسائز اہلکاروں پر فائرنگ کے نتیجے میں 2 اہلکار شہید ہوگئے۔پولیس ذرائع نے بتایا کہ ڈیرہ اسمٰعیل خان میں درہ بن بائی پاس کے قریب ہوٹل پر بیٹھے اہلکاروں پر نامعلوم افراد نے فائرنگ کردی۔
فائرنگ کے نتیجے میں 2 اہلکار شہید ہوگئے، فائرنگ کی زد میں آکر ہوٹل مالک بھی زخمی ہوا، واقعے کے بعد مسلح افراد فرار ہونے میں کامیاب ہوگئے۔پولیس نے ملزمان کی گرفتاری کے لیے سرچ آپریشن شروع کردیا۔
