ابوظہبی : پاکستان اور متحدہ عرب امارات (یو اے ای) کے درمیان پاکستانی شہریوں کی لیے ویزا خصوصا ورک ویزا میں آسانیاں پیدا کرنے سے متعلق ضروری اقدامات پر اتفاق ہوگیا۔
وزیر داخلہ محسن نقوی کی دورہ متحدہ عرب امارات میں نائب وزیراعظم یواے ای شیخ سیف بن زاید النہیان سے ملاقات ہوئی۔وفاقی وزیر محسن نقوی کی یو اے ای وزارت داخلہ آمد پر گارڈ آف آنر پیش کیا گیا، نائب وزیراعظم یواے ای شیخ سیف بن زاید النہیان نے محسن نقوی کا استقبال کیا۔حسن نقوی کا یو اے ای کی وزارت داخلہ کے اعلی حکام سے تعارف کروایا گیا جبکہ ملاقات میں پاکستانی شہریوں کو درپیش ویزا کے مسائل، سیکورٹی تعاون، انسداد منشیات، غیر قانونی امیگریشن کی روک تھام کیلئے اشتراک کار بڑھانے اور ٹیکنالوجی کے تبادلے پر گفتگو ہوئی۔
دونوں ممالک کے درمیان مختلف شعبوں میں تعاون کو فروغ دینے کے عزم کا اعادہ بھی کیا گیا۔دونوں رہنمائوں کے درمیان ملاقات میں علاقائی صورتحال اور خطے میں پائیدار امن سے متعلق بھی بات چیت کی گئی، ملاقات میں سیکورٹی چیلنجز سے نمٹنے کیلئے جدید ٹیکنالوجی اور اے ای سے استفادہ کی ضرورت پرزور دیا گیا۔پاکستانیوں کیلئے ویزامیں آسانی پیدا کرنے کے حوالے سے ضروری اقدامات پر اتفاق رائے بھی کیا گیا، شیخ سیف بن زاید النہیان نے محسن نقوی کو ہر ممکن تعاون کی یقین دہانی کرائی۔
اس موقع پر وزیر داخلہ محسن نقوی نے کہا کہ سیکورٹی سمیت ہر شعبے میں تعاون کو مزید وسعت دینا چاہتے ہیں،انہوں نے کہا کہ پاکستانیوں کی بڑی تعداد یواے ای کی معیشت کی مضبوطی میں کردار ادا کر رہی ہے، ویزا پالیسی میں آسانی سے شہریوں کو بہت ریلیف ملے گا۔وزیرداخلہ محسن نقوی نے جرائم کی روک تھام کیلئے ابوظہبی پولیسنگ کے نظام اور آپریشنز روم کا دورہ کیا، جہاں وزارت داخلہ کے حکام نے ان کو مانیٹرنگ آپریشنز روم کے بارے میں بریفنگ دی۔ محسن نقوی نے پولیس مانیٹرنگ کے نظام میں گہری دلچسپی کا اظہارکیا اور پولیسنگ سسٹم کی تعریف کی۔
پاکستان اور یو اے ای کا ویزا میں آسانیاں پیدا کرنے پر اتفاق
