گوجرانوالا:گوجرانوالا کی انسداد دہشت گردی عدالت نے وزیر آباد میں بانی پی ٹی آئی عمران خان کی ریلی پر فائرنگ اور حملے کے کیس کے ملزم نوید کو 2 بار عمر قید کی سزا سنادی۔
انسداد دہشت گردی عدالت میں 3 نومبر 2022ء کو وزیرآباد میں ریلی کے دوران بانی پی ٹی آئی پر حملے کے کیس کی سماعت کی۔انسداد دہشت گردی عدالت نے مقدمہ کا فیصلہ سناتے ہوئے مرکزی ملزم نوید احمد کو 2 بار عمر قید اور مجموعی طور پر 15 لاکھ جرمانے کی سزا سنائی۔
عدالتی فیصلے میں کہا گیا کہ ملزم نوید کیخلاف تمام سزائیں اکٹھی چلیں گی،عدالت نے مقدمے کے دیگر ملزمان طیب بٹ اور وقاص کو بری کر دیا۔عدالت نے فائرنگ سے جاں بحق معظم کو قتل کرنے کے جرم میں ملزم نوید کو ایک مرتبہ عمر قید کی سزا سنائی اور دہشت گردی کا جرم ثابت ہونے پر ایک اور مرتبہ عمر قید کی سزا سنائی گئی۔
ملزم کو چار افراد کو زخمی کرنے کے جرم میں تین سے پانچ سال تک قیدکی سزا سنائی گئی اور اس پر 15 لاکھ روپے جرمانہ بھی عائدکیا گیا۔عدالت نے مقدمہ کے زخمی گواہ بانی پی ٹی آئی کی عدم پیروی پر حق صفائی ختم کردیا۔
دوران سماعت عدالت نے بانی پی ٹی آئی کو 8 مرتبہ عدالت میں طلب کیا۔ بانی پی ٹی آئی کو متعدد بار اڈیالہ جیل سے ویڈیو لنک پر بھی پیش ہونے کا حکم دیا گیا لیکن بانی پی ٹی آئی نے بطور گواہ بیان ریکارڈ نہیں کروایا۔
