اسلام آباد:وزیراعظم شہباز شریف نے کہا ہے کہ اوورسیز پاکستانی دنیا بھر میں ہمارے سفیر ہیں، اپنا سرمایہ پاکستان لے کر آئیں اور مسلح افواج سمیت پاکستان کے خلاف زہریلا پروپیگنڈا کرنے والوں کو بے نقاب کریں۔
اوورسیز کنونشن سے خطاب کرتے ہوئے انہوں نے کہاکہ سمندر پار پاکستانیوں کی کنونشن میں شرکت کو سلام پیش کرتا ہوں، تارکین وطن ملک سے بے پناہ محبت کرتے ہیں۔شہباز شریف نے کہاکہ پاکستان کا دفاع محفوظ ہاتھوں میں ہے، آرمی چیف جنرل عاصم منیر ایک سچے پاکستانی اور عظیم پروفیشنل ہیں، ان کے ہوتے کوئی بھی پاکستان کی طرف میلی آنکھ سے نہیں دیکھ سکتا۔
انہوں نے کہاکہ ایک کروڑ سے زیادہ پاکستانی دنیا کے مختلف حصوں میں آباد ہیںجنہوں نے شبانہ روز محنت سے اپنا نام کمایا، تارکین وطن ہمارے سروں کا تاج ہیں۔شہباز شریف نے کہاکہ سمندر پار پاکستانیوں پر جتنا کچھ نچھاور کیا جائے وہ بھی کم ہے، ہم ہر سال 15 اوورسیز پاکستانیوں کو سول ایوارڈ سے نوازیں گے۔
انہوں نے کہاکہ 2018 ء میں ملک سے دہشت گردی کا خاتمہ ہو چکا تھا لیکن پھر ملک میں دہشت گردوں کو لاکر بسا دیا گیا، ہمیں معلوم ہے کہ ان دہشت گردوں کو کس کی سپورٹ ہے اور کون فنڈنگ کرتا ہے۔وزیراعظم نے کہاکہ افواج پاکستان نے دہشت گردوں کے خلاف جو جہاد کیا اس کی مثال عصر حاضرمیں نہیں ملتی، آرمی چیف کے دل میں جو ہوتا ہے وہی زبان پر ہوتا ہے۔
انہوں نے کہا کہ وطن کا جوان ہم سب کی حفاظت کے لیے اپنے بچوں کو یتیم کرجائے اور پھر سوشل میڈیا پر اس کے خلاف جو زہر اگلا جائے تو کیا وہ برداشت کیا جاسکتا ہے، اس کے لیے کوئی نرم گوشہ رکھ سکتا ہے، یہی فرق ہے ہارڈ اسٹیٹ اور سافٹ اسٹیٹ میں، ہارڈ اسٹیٹ کے یہی تقاضے ہیں جب کہ سافٹ اسٹیٹ کے جو دوسرے تقاضے ہیں وہ آپ اچھی طرح جانتے ہیں۔
وزیراعظم نے سمندر پار پاکستانیوں کے لیے اعلانات کرتے ہوئے کہاکہ اوورسیز پاکستانیوں کے مقدمات کی سماعت کے لیے اسلام آباد میں عدالتیں قائم کردی گئی ہیں جبکہ پنجاب میں اس پر کام ہورہا ہے۔انہوں نے کہاکہ اوورسیز پاکستانیوں کو ویڈیو لنک کے ذریعے پیشی کی سہولت فراہم کی جائیگی۔
اس کے علاوہ ان کے بچوں کے لیے میڈیکل کالجز میں 15 فیصد کوٹہ مختص کیا جائیگا جبکہ جامعات میں بھی کوٹہ 5 فیصد ہوگا۔اورسیز پاکستانیوں کیلئے سرکاری ملازمتوں میں عمرکی حد میں پانچ سال کی چھوٹ ہے ۔انہوں نے کہاکہ بورڈ آف ریونیو پنجاب میں اوورسیز پاکستانیوں کی سہولت کے لیے خصوصی سیل بنا دیا گیاجبکہ اب تمام اوورسیز پاکستانیوں کو فائلر سمجھا جائیگا۔
شہباز شریف نے اپنے اعلان میں کہاکہ اوورسیز پاکستانیوں کے 5 ہزار بچوں کو ہنر سکھایا جائیگا جبکہ تارکین وطن کی سہولت کے لیے میرپور میں انٹرنیشنل ایئرپورٹ بنایا جائیگا۔انہوں نے کہاکہ بیرون ملک پاکستانیوں کی ترسیلات زر ہماری برآمدات سے زیادہ ہیں۔
نواز شریف نے ایئرپورٹس پر جس گرین چینل کا آغاز کیا تھا چند ہفتوں میں آپریشنل ہو جائیگا۔انہوں نے کہا کہ مارچ میں اوورسیز پاکستانیوں نے ریکارڈ 4.1 ڈالر کی ترسیلات زر بھیجیں، آپ لوگ اسی طرح بھیجتے رہے تو ملکی مزید ترقی کرے گا۔وزیراعظم نے کہا کہ بیرون ممالک سے موبائل لانے پر ٹیکس کم کرنے پر غور کریں گے۔
