پشاور میں فائرنگ کے دو الگ واقعات میں ایک عالم دین جاں بحق اور دوسرا زخمی ہوگیا، واقعے کے خلاف شہریوں نے یونیورسٹی روڈ پر احتجاج کیا۔
پولیس کے مطابق دونوں واقعات پشاور کے تھانہ پشتخرہ کی حدود میں پیش آئے، دورہ روڈ سفید ڈھیری میں نامعلوم افراد کی فائرنگ سے قاری اعجاز جاں بحق ہوگئے۔ قاری اعجاز سفید ڈھیری عالمی مجلس تحفظ ختم نبوت کے امیر تھے۔
دوسرا واقعہ نواں کلی میں پیش آیا جہاں قاری شاہد کو فائرنگ کرکے زخمی کردیاگیا، قاری شاہد بھی انٹرنیشنل مجلس ختم نبوت کے ضلعی امیر ہیں۔
پولیس کے مطابق جاں بحق قاری اعجاز کی لاش پوسٹ مارٹم اور زخمی قاری شاہد کو علاج کے لیے ہسپتال منتقل کردیا گیا، پولیس نے دونوں واقعات کے بعد علاقے میں ناکہ بندی کر کے چیکنگ سخت کردی ہے۔
دوسری جانب فائرنگ کے واقعات کے خلاف شہریوں نے یونیورسٹی روڈ پر احتجاج کیا اور قاتلوں کی فوری گرفتاری کا مطالبہ کیا۔
