پشاور:خیبر پختونخوا میں عید الفطر کے موقع پر سیکورٹی خدشات کے باعث سیاسی شخصیات کی عید کی روایتی تقریبات شدید متاثر ہوگئیں۔
جمعیت علمائے اسلام کے سربراہ مولانا فضل الرحمن سمیت اہم شخصیات کو عید کی نماز گھروں پر پڑھنے کا مشورہ دے دیا گیا۔ اس ضمن میں وفاقی حکومت کی جانب سے سیاسی جماعتوں کے قائدین اور اہم رہنماؤں کے ساتھ ساتھ مذہبی رہنماؤں کو احتیاط کرنے کی ہدایت کی گئی ، بیشتر رہنماؤں بشمول مولانا فضل الرحمن کو عید کی نماز بھی اپنی رہائش گاہ پر پڑھنے کی درخواست کی گئی ۔
اس کے علاوہ دیگر سیاسی شخصیات کو عوامی سطح پر عید ملن تقریبات کو محدود، رہائش گاہوں اور حجروں پر بھی حفاظتی انتظامات کرنے کی ہدایت کی گئی ہے۔صوبائی حکومت نے تمام سیاسی شخصیات کے لیے خصوصی سیکورٹی انتظامات کیے ہیں، عید کے موقع پر عام شہریوں کو بھی احتیاطی تدابیر اختیار کرنے کی ہدایت کی گئی ۔
