ڈی جی خان ، خوارجی دہشت گردوں کا بڑا حملہ ناکام بنادیا گیا

لاہور : پنجاب پولیس ڈی جی خان کی بڑی کامیابی، پنجاب خیبر پختونخوا بارڈر چیک پوسٹ لکھانی پر رواں ہفتے میں خوارجی دہشت گردوں کا دوسرا بڑا حملہ ناکام بنا دیا۔
ترجمان پنجاب پولیس کے مطابق 15سے 20 خوارجی دہشت گردوں نے سرحدی چوکی لکھانی پر سحری کے وقت اچانک حملہ کیا، خوارجی دہشت گرد چھوٹی ٹولیوں کی شکل میں چیک پوسٹ پر چاروں اطراف سے حملہ آور ہوئے، خوارجی دہشت گردوں نے حملے میں راکٹ لانچرز، بھاری اسلحہ کا استعمال کیا۔
جوانوں کے الرٹ ہونے کے سبب تھرمل امیج کیمروں سے دہشت گردوں کی دور سے نشاندہی کر لی گئی، پولیس اہلکاروں نے بروقت مشین اور مارٹر گنز سے فائرنگ کرکے فوری جوابی کارروائی کی، بھرپور جوابی کارروائی سے خوارجی دہشت گرد چیک پوسٹ کے قریب پہنچنے میں ناکام رہے اور پسپائی اختیار کر گئے۔
ترجمان پنجاب پولیس کے مطابق موثر جوابی کارروائی کے نتیجہ میں دہشت گردوں کو بھاری جانی نقصان پہنچنے کی اطلاعات ہیں، 06دن قبل بھی خوارجی دہشت گردوں کے چیک پوسٹ لکھانی ہر حملے کو ناکام بنایا گیا تھا۔ دہشت گردوں کے خلاف آپریشن کی کمانڈ آر پی او ڈی جی خان کیپٹن (ر) سجاد حسن خان نے کی، ڈی پی او ڈیرہ غازی خان سید علی کی زیر کمانڈ کیو آر ایف کی بیک اپ ٹیمیں فوری موقع پر پہنچیں۔
آئی جی پنجاب ڈاکٹر عثمان انور نے دہشت گردوں کا حملہ پسپا کرنے والے جوانوں کو شاباش دیتے ہوئے کہا کہ پنجاب پولیس قبل ازیں خوارجی دہشت گردوں کے 19حملے ناکام بنا چکی ہے، دہشتگردوں کو ہر محاذ پر شکست دیں گے، پنجاب پولیس ہر قیمت پر عوام کے جان و مال کا تحفظ یقینی بنائے گی۔حکومت پنجاب کی جانب سے پنجاب کے پی کے بارڈر پر سرحدی چوکیوں کو جدید ترین اسلحہ فراہم کیا گیا ہے، جوانوں کے الرٹ ہونے کے باعث خوارجی دہشتگرد اپنے مذموم مقاصد میں کامیاب نہیں ہو سکے۔ آر پی او غازی خان نے کہا کہ پنجاب خیبرپختونخوا کے سرحدی علاقوں میں پولیس کا دیگر اداروں کے ہمراہ سرچ آپریشن جاری ہے۔