اسلام آباد: قومی اسمبلی نے ارکان پارلیمنٹ کی تنخواہوں اور الائونسز میں اضافے کا ترمیمی بل کثرت رائے سے منظور کرلیا۔
نجی ٹی وی کے مطابق قومی اسمبلی اجلاس میں ارکان کی تنخواہوں اور الاونسز میں اضافے سے متعلق بل رومینہ خورشید عالم نے پیش کیا جسے کثرت رائے سے منظور کرلیا گیا۔ ترمیمی بل کے تحت ارکان پارلیمنٹ کی تنخواہ اورمراعات وفاقی سیکرٹری کے برابر کردی گئی ہیں، ایم این اے اورسینیٹرکی ماہانہ تنخواہ ومراعات 5لاکھ 19ہزار مقرر کرنے کی منظوری دی گئی ہے۔
اس موقع پر اسپیکر قومی اسمبلی ایاز صادق نے کہا کہ آپ لوگ پارلیمنٹ کو جعلی بھی کہتے ہیں اورخود سنجیدہ نہیں ہوتے، جو رکن بڑھی ہوئی اضافی تنخواہ نہیں لینا چاہتا وہ لکھ کردے۔ وزیرقانون اعظم نذیرتارڑ نے بھی کہا کہ جو ممبران بڑھی ہوئی تنخواہ نہیں لینا چاہتے وہ اسپیکر آفس کو مطلع کردیں۔ا
سپیکر نے بل پر رائے شماری کرائی جس کے بعد بل منظور کیے جانے کا اعلان کیا۔اپوزیشن کے کسی رکن نے تنخواہ و الاؤنسز ترمیمی بل کی مخالفت نہیں کی۔پیپلز پارٹی، ن لیگ اور پی ٹی آئی سمیت دیگر جماعتیں بھی تنخواہ بڑھانے پر ہم آواز تھیں، اراکین پارلیمنٹ نے ایم این اے اورسینیٹر کی تنخواہ 10لاکھ ماہانہ کا مطالبہ کیا تھا مگر اسپیکر ایاز صادق نے یہ مطالبہ مسترد کردیا تھا۔ اس سے قبل ممبر قومی اسمبلی کی تنخواہ 2لاکھ 18ہزار ہوا کرتی تھی۔
