بھارت حسینہ واجد کو بیان بازی سے روکے،بنگلا دیش کا مطالبہ

ڈھاکہ:بنگلا دیش نے بھارت سے کہا ہے کہ سابق وزیراعظم شیخ حسینہ واجد کو اپنے ملک میں رہتے ہوئے جھوٹے اور من گھڑت بیانات دینے سے روکے۔
برطانوی خبر رساں ا دارے کے مطابق وزارت خارجہ نے اپنے ایک بیان میں کہاہے کہ اس نے ڈھاکا میں انڈیا کے قائم مقام ہائی کمشنر کو احتجاجی مراسلہ دیا جس میں شیخ حسینہ واجد کے بیانات پر شدید تشویش اور تحفظات کا اظہار کیا گیا۔
بیان میں کہا گیا ہے کہ وزارت نے درخواست کی ہے کہ انڈیا باہمی احترام کے جذبے کے تحت انہیں اس طرح کے جھوٹے، من گھڑت اور اشتعال انگیز بیانات دینے سے روکنے کے لیے فوری طور پر مناسب اقدامات کرے جب تک وہ انڈیا میں ہیں۔
بدھ کو سوشل میڈیا پر اپنے آن لائن خطاب میں شیخ حسینہ نے اپنے حامیوں سے اپیل کی تھی کہ وہ بنگلا دیش میں عبوری حکومت کے خلاف اٹھ کھڑے ہوں۔ انہوں نے عبوری حکومت پر غیرآئینی طریقے سے اقتدار پر قبضے کا بھی الزام لگایا۔