کرم(اسلام ڈیجیٹل)لوئر کرم کے علاقے بگن اورمضافات میں شرپسندوں کیخلاف تیسرے روز بھی کارروائیاں جاری رہیں۔ضلعی انتظامیہ کے مطابق بگن اورمضافات میں جاری کارروائیوں میں ہیلی کاپٹرزکا بھی استعمال کیاجارہاہے اور بگن جانے والے راستوں پر پولیس اورسیکورٹی فورسز کے دستے تعینات ہیں۔
سیکورٹی فورسز کی جانب سے اسلحہ جمع کرانے کے اعلانات کیے جارہے ہیں اور کہا جا رہا ہے کہ مکین اپنا اسلحہ جمع کرادیں۔مقامی ذرائع کا کہنا ہے کہ اسلحہ جمع کرانے سے متعلق قبائلی عمائدین کا جرگہ بھی جاری ہے۔
اس حوالے سے کمشنر کوہاٹ کا کہنا تھاکہ کرم میں کارروائیاں مقامی افرادکیخلاف نہیں، شرپسندوں کے خلاف کی جارہی ہیں۔اْدھر بگن متاثرین کا مندوری کے مقام پر دھرنا جاری ہے۔دوسری جانب کْرم متاثرین کے حوالے سے نجی ٹی وی سے گفتگو میں ڈپٹی کمشنر ہنگو گوہر زمان وزیر کا کہنا تھاکہ کْرم سے ابھی تک کوئی متاثرین کیپموں میں نہیں آئے ہیں، ٹل انٹری پوائنٹ پرعملہ موجود اور تمام محکمے الرٹ ہیں۔
ان کا کہنا تھاکہ محمد خواجہ کے مقام پرکیمپ قائم کرنے کیلئے جگہ مختص کی ہے، ٹل میں 3 سرکاری عمارتیں بھی مختص کی گئی ہیں تاہم کرم سے آئے 20کے قریب خاندان رشتہ داروں کے پاس چلے گئے ہیں۔
