ژوب/اسلام آباد(اسلام ڈیجیٹل)سیکورٹی فورسز نے ژوب میں پاک افغان سرحد کے قریب کامیاب کارروائی کرتے ہوئے دراندازی کی کوشش کرنے والے 5خارجی دہشت گردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر)کی جانب سے جاری بیان میں بتایا گیا کہ 18اور19 جنوری کی رات خوارج کے ایک گروپ نے پاک افغان سرحد سے درااندازی کی کوشش کی، فورسز نے ژوب کے علاقہ سمبازہ سے دراندازی کی کوشش ناکام بنا دی۔ سیکورٹی فورسزکی موثر کارروائی کے نتیجے میں 5خوارج جہنم واصل کر دیے گئے،پاکستان عبوری افغان حکومت سے مسلسل کہتا آرہا ہے کہ وہ سرحد کے اطراف موثر بارڈر مینجمنٹ کو یقینی بنائے۔
توقع ہے کہ عبوری افغان حکومت اپنی ذمہ داریاں پوری کرے گی، افغان حکومت خوارج کوپاکستان کے خلاف دہشت گردی کی کارروائیوں کے لیے اپنی سرزمین استعمال کرنے سے روکے۔ پاکستان کی سیکورٹی فورسز اپنی سرحدوں کو محفوظ بنانے اور دہشت گردی کی لعنت کو ختم کرنے کے لیے پرعزم ہیں۔
ادھروزیراعظم شہباز شریف نے ضلع ژوب میں خوارج کے دہشت گردوں کے خلاف کامیاب کارروائی پر سیکورٹی فورسز کی ستائش کی۔ اپنے ایک بیان میں انہوںنے کہاکہ پاکستان کی بہادر افواج سرحدوں کی حفاظت کے لئے سیسہ پلائی دیوار کی طرح کھڑی ہیں۔ دہشت گردی کے خلاف جنگ میں پوری قوم سیکورٹی فورسز کے ساتھ کھڑی ہے، ملک سے ہر قسم کی دہشت گردی کے خاتمے کے لئے پر عزم ہیں۔
