ملک کے مختلف شہروں میں بارش اور برفباری سے نظام زندگی مفلوج

کوئٹہ /لاہور/کراچی(اسلام ڈیجیٹل) بلوچستان کے مختلف علاقوں میں موسلادھار بارش اور برفباری سے سردی کی شدت بڑھ گئی۔

کوئٹہ، چمن، درہ کوژک، قلعہ عبداللہ اور زیارت سمیت کئی مقامات پر برفباری اور بارش ہوئی، زیارت شہر میں رات سے اب تک 3انچ برف پڑچکی ہے، بارش کے بعد نشیبی علاقے زیر آب آگئے ہیں جس کے باعث این 25چمن کوئٹہ کراچی شاہراہ پر ایمرجنسی نافذ کر دی گئی ہے۔بارش اور برفباری سے شمالی بلوچستان کے بیشتر علاقوں میں بجلی کا بریک ڈاؤن ہوگیا۔برفانی طوفان کے باعث کوژک ٹاپ میں روڈ کلیئرنس آپریشن بھی معطل ہوگیا ہے، جس سے بلوچستان، پنجاب اور خیبرپختونخوا کیلئے آمدورفت معطل ہوکر رہ گئی اور کئی گاڑیاں پھنس کر رہ گئیں۔ادھرپنجاب کے مختلف شہروں میں شدید دھند سے راستے گم ہو گئے ، دھند کی وجہ سے نظام بری طرح متاثر رہا،حد نگاہ کم ہونے پر موٹر ویز متعدد مقامات سے بند رکھی گئی ۔

ترجمان موٹر وے پولیس کے مطابق موٹر وے ایم 2 لاہور سے کوٹ مومن ،ایم 3 لاہور سے ملتان ،ایم 4 پر پنڈی بھٹیاں سے ملتان ، موٹر وے ایم 5 پر ملتان سے اوچ شریف تک بند رکھی گئی ۔ لاہور سیالکوٹ موٹروے ایم 11 بھی دھند کے باعث بند رہی ، قومی شاہراہوں پر حد نگاہ کم ہونے پر ٹریفک کی روانی متاثر رہی ۔ حد نگاہ بہتر ہونے پر موٹر وے کو مرحلہ وار کھول دیا گیا۔دوسری جانبشہر قائد میں یخ بستہ ہواؤں کے باعث سردی کی شدت میں اضافہ ہونے سے گزشتہ روز کے مقابلے میں درجہ حرارت 4.3ڈگری سینٹی گریڈ کم ریکارڈ ہوا۔

محکمہ موسمیات کے مطابق کم سے کم درجہ حرارت 10.2ڈگری سینٹی گریڈ ریکارڈ ہوا، یخ بستہ ہواؤں کے باعث سردی کی شدت اصل درجہ حرارت سے 2تا 4درجے زیادہ محسوس ہو رہی ہے۔ ہلکی دھند کے باعث حدِ نگاہ 2.5کلو میٹر ریکارڈ ہوئی۔کراچی میں آئندہ 24گھنٹوں کے دوران موسم سرد اور خشک رہے گا جبکہ زیادہ سے زیادہ درجہ حرارت 27اور کم سے کم 10ڈگری سینٹی گریڈ متوقع ہے۔آئندہ 24گھنٹوں میں 5سے 25کلو میٹر فی گھنٹہ کی رفتار سے شمال مشرقی سمت سے ہوائیں چلنے کا امکان ہے۔محکمہ موسمیات کے مطابق بارش اور برفباری کا سلسلہ کل تک جاری رہے گا، کئی شہروں میں فلیش فلڈنگ کا خدشہ بھی ہے۔ محکمہ موسمیات کا کہنا ہے کہ اسلام آباد، مری اور گلیات میں بھی بادل برسنے کا امکان ہے، پشاور، چترال، دیر، سوات میں بھی بارش متوقع ہے۔ملک کے بیشتر علاقوں میں موسم آج بھی سرد اور خشک رہے گا۔