مقبوضہ کشمیر میں بھارتی فوج کی گاڑی دھماکے میں تباہ،متعدداہلکارزخمی،ہلاکتوں کا خدشہ

سری نگر:مقبوضہ کشمیر میں معمول کے گشت پر مامور بھارتی فوج کی گاڑی کو دھماکے سے اْڑا دیا گیا جس میں 10 فوجی سوار تھے۔کشمیر میڈیا سروس کے مطابق ضلع راجوڑی میں بھارتی فوج کی گاڑی مبینہ طور پر بارودی سرنگ پر چڑھ گئی جس سے زور دار دھماکا ہوا اور افراتفری پھیل گئی۔ مزید نفری طلب کی گئی اور علاقے کا محاصرہ کرلیا گیا۔
امدادی کاموں کے دوران 8 فوجی اہلکاروں کو شدید زخمی حالت میں قریبی ملٹری ہسپتال منتقل کیا گیا جہاں 6 کی حالت نازک بتائی جا رہی ہے۔عینی شاہدین کا کہنا ہے کہ جائے وقوعہ سے چند فوجی مردہ حالت میں ہسپتال منتقل کیے گئے تاہم بھارتی فوج کا کہنا ہے کہ دھماکے میں ہونے والے زخمیوں میں سے چند کی حالت تشویشناک ہے۔ادھر آزاد ذرائع نے دعویٰ کیا ہے کہ دھماکے کی نوعیت اور زخمیوں کی نازک حالت کے پیش نظر ہلاکتوں کا خدشہ ہے۔