وفاق اور صوبوں میں پل کا کرداراداکریں گے،پانچوں گورنروں کا اتفاق

کراچی(اسلام ڈیجیٹل)گورنرہائوس سندھ میں منعقدہ پہلی گورنرز سمٹ میں پانچوں گورنرز نے وفاق اور صوبے کے درمیان پل کا کردار ادا کرنے کی حمایت کردی ۔
کامران ٹیسوری کا کہنا ہے کہ پاکستان اور فورسز کو بدنام کرنے میں اڈیالہ کے قیدی کا کردار ہے، اسے معلوم ہونا چاہیے کہ اس سے ملک کا نقصان ہے۔پہلی گورنرز سمٹ سے خطاب میں کامران ٹیسوری نے کہا کہ اگر قیدی کو سمجھانے اڈیالہ جانا پڑا تو ملک کے لئے جائیں گے، گورنر ہائوس سندھ میں تمام گورنرز کی موجودگی دلیل ہے کہ ریاست پہلے اور سیاست بعد میں ہے۔
گورنر پنجاب سردار سلیم حیدر نے کہا کہ آئین اور قانون کے تحت جو اختیارات ہیں وہ کسی کو نہیں دیں گے۔ گورنر خیبر پختونخوا فیصل کریم کنڈی کا کہنا تھاکہ وفاق اور صوبے کے درمیان پل کا کردار ادا کرنا چاہتے ہیں۔
گورنر بلوچستان جعفر خان مندوخیل نے کہا کہ سب کا فرض ہے کہ ملک میں معاشی بہتری کے لئے کردار ادا کریں۔ہمیں یہ تسلیم کرنا چاہیے کہ ہر گورنر کا کردار اپنی صوبائی حدود سے باہر بھی ہے ،ہم سب ایک بڑے فریم ورک کا حصہ ہیں جو پاکستان کے معاشی انقلاب کو آگے بڑھانے کیلئے ہماری مشترک کوششوں کا تقاضا کرتا ہے۔ وزیر اعظم سے لیکر وزیر اعلیٰ تک ہم سب اپنی قوم کے مستقبل کے رکھوالے ہیں۔
گورنر گلگت بلتستان مہدی شاہ نے امید ظاہر کی کہ اس کانفرنس کے ذریعے مسائل حل کرنے میں مدد ملے گی۔