ریاض(اسلام ڈیجیٹل)سعودی حکومت کی جانب سے مسافروں کیلئے نئی سفری ہدایت جاری کردی ہیں۔غیرملکی ٹی وی کی رپورٹ کے مطابق سعودی عرب نے نئی سفری ہدایت میں گردن توڑ بخار سمیت دیگر ویکسین لازمی قرار دی ہیں، ایک سال اور اس سے کم عمر بچوں کو ویکسین سے استثنا ہوگا۔
سعودی سول ایوی ایشن کے مطابق دنیا بھر کی تمام ایئرلائنز کو اس حوالے سے آگاہ کر دیا گیا ہے، صحت سے متعلق نئی ہدایات پر سختی سے عملدرآمد کرنا ہوگا۔سعودی سول ایوی ایشن ترجمان کا کہنا تھا کہ مسافروں کے پاس آمد سے دس دن قبل جاری کردہ ویکسی نیشن سرٹیفکیٹ لازمی ہونا چاہیے۔پولی سیکرائیڈ کی قسم کے لیے تین سال سے زیادہ پرانا سرٹیفکیٹ نہیں ہونا چاہیے،
کنجوگیٹڈ قسم کے لیے پانچ سال سے زیادہ پرانا ویکسی نیشن سرٹیفکیٹ نہیں ہونا چاہیے۔سعودی ایوی ایشن کے احکامات کی خلاف ورزی کرنے والی ایرلائنز اور مسافروں کے خلاف قوانین کے تحت کارروائی ہوگی۔
