سندھ میں تیل چوری کیس، سی ٹی ڈی نے کارروائی کے لیے ایف آئی اے کو خط لکھ دیا

کراچی(مانیٹرنگ ڈیسک)سندھ میں سرکاری لائن سے تیل چوری کیس میں سی ٹی ڈی نے کارروائی کے لیے ایف آئی اے کو خط لکھ دیا۔
سی ٹی ڈی کی جانب سے ایف آئی اے کو لکھے گئے خط میں کہا گیا ہے کہ ملوث ملزمان کے خلاف منی لانڈرنگ کی تحقیقات کی جائے،ملزمان سرکاری آئل لائن سے تیل چوری کرکے فروخت میں ملوث ہیں۔
سی ٹی ڈی نے ملزمان کا مکمل ریکارڈ ایف آئی اے کو ارسال کیاہے۔خط کے مطابق ملزمان کے خلاف سندھ میں 5 برس کے دوران 23 مقدمات درج ہوئے ہیں۔خط میں بتایا گیا ہے کہ گروہ میں لطف سیال، عبیداللہ، مہران ،گل خان اور یونس سمیت 16 افراد ہیں، ملزمان نے کالعدم تنظیم کو فنڈنگ بھی فراہم کی۔