مودی سرکار کوبڑا دھچکا،چین نے لداخ کے اہم علاقے اپنے نام کرلیے

نئی دہلی(اسلام ڈیجیٹل)چین نے بھارت کو ایک اور دھچکا دیتے ہوئے لداخ کے اہم حصے اپنے نام کرلیے ۔میڈیارپورٹوں کے مطابق چین نے ہوتان خطے میں لداخ کے کچھ حصے شامل کر کے دو نئی کائونٹیوں کے قیام کا اعلان کر دیا،چینی پیشرفت پر مودی حکومت سیخ پا گئی۔
بھارتی وزارت خارجہ نے بیجنگ کے خلاف احتجاج بھی ریکارڈ کرادیا۔ یہ پہلا موقع ہے جب بھارت اور چین نے ہمالیائی سرحدی تنازعے پر کھلے طور پر اعتراض کیا ہے۔چین کی جانب سے اعلان پانچ سال بعد سرحدی مذاکرات دوبارہ شروع کرنے کے چند دن بعد کیا گیا۔بھارتی قومی سلامتی کے مشیر اجیت دوول نے گزشتہ ماہ بیجنگ کا دورہ کرکے سرحدی علاقوں پر مذاکرات بھی کیے تھے۔
دسمبر 2024 میں چینی دفاعی ترجمان نے کہا تھا کہ سرحدی علاقوں میں امن برقرار رکھنے کیلئے مشترکہ کوششوں کیلئے تیار ہیں۔بھارتی وزارت خارجہ کے ترجمان رندھیر جسوال کا کہنا ہے کہ ہوتان پریفیکچر میں دو نئی کاونٹیز کے کچھ حصے لداخ میں آتے ہیں۔