پاکستان میں صحافیوں کیلئے 2024ء بد ترین سال رہا،میڈیا واچ ڈاگ

کراچی(اسلام ڈیجیٹل)میڈیا واچ ڈاگ کی رپورٹ میں انکشاف ہوا ہے کہ پاکستان میں صحافیوں کے لیے 2024ء بد ترین سال رہا، 6 صحافی اپنی جان سے گئے جب کہ57صحافیوں کو رپورٹنگ کے دوران تشدد اور دیگر مسائل کا سامنا رہا۔میڈیا واچ ڈاگ فریڈم نیٹ ورک کی جاری کردہ رپورٹ میں پاکستان کے صحافیوں کی حفاظت کے حوالے سے 2024ء کو خطرناک اور بدترین سال قرار دیا گیا ہے۔رپورٹ کے مطابق اس سال 6صحافی جاں بحق ہوئے جب کہ 11پر قانلانہ حملے ہوئے اور 57کو مختلف نوعیت کے مسائل کا سامنا رہا، جن میں دھمکیاں، حملے اور ہراسانی شامل ہیں۔الیکٹرونک صحافیوں کو سب سے زیادہ مسائل کا سامنا رہا، رپورٹ کے مطابق 9فیصد خواتین صحافیوں کودھمکیوں اور ہراسمنٹ کا سامنا رہا۔وفاقی اور صوبائی حکومتوں کی جانب سے حفاظتی قوانین کے نفاذ کے باوجود صحافی مسائل کا شکار ہیں، رپورٹ کے مطابق سندھ سب سے زیادہ خلاف ورزیاں ریکارڈ کی گئیں، دوسرے نمبر پر پنجاب اور تیسرے نمبر پر اسلام آباد صحافی برادری کے لیے خطرناک ترین مقامات رہے۔