راولپنڈی:ڈیرہ اسماعیل خان میں سیکورٹی فورسز کی کارروائی کے نتیجے میں فتنة الخوارج کے سرغنہ عالم محسود سمیت 10 دہشت گرد ہلاک اور 4 زخمی ہوگئے۔
سیکورٹی ذرائع نے بتایا کہ فورسز نے ڈیرہ اسماعیل خان کے علاقے کلاچی میں دہشت گردوں کی موجودگی کی اطلاع پر انٹیلی جنس بیسڈ آپریشن کیا۔ذرائع کا کہنا تھا کہ آپریشن کے دوران سیکورٹی فورسز نے فتنة الخوارج کے 10 دہشت گردوں کو ہلاک کر دیا اس دوران 4 خارجی زخمی بھی ہوئے، ہلاک کئے گئے 4 خارجیوں کا تعلق افغانستان سے ہے۔
سیکورٹی ذرائع کا کہنا تھا کہ ہلاک ہونے والے دہشت گردوں کے قبضے سے بھاری مقدار میں بارودی مواد، خود کش جیکٹس،آئی ای ڈیز اور اسلحہ برآمد ہوا۔
دوسری جانب ذرائع نے مزید بتایا کہ خارجی عالم محسود 2008ء میں نواز کوٹ پوسٹ پر حملے میں ملوث تھا جبکہ بنوں جیل اور آرمی پوسٹ پر حملے میں بھی ملوث رہا ہے، 2010ء میں بنوں جیل حملے اور 2014ء میں فوجی پوسٹ پر حملے کی منصوبہ بندی میں بھی پیش پیش رہا۔فورسز نے علاقے کو کلیئر کرکے سرچ آپریشن مزید تیز کر دیا ہے تاکہ کسی بھی ممکنہ نیٹ ورک یا سہولت کار کو پکڑا جا سکے۔
