وفاقی حکومت کے 16ماہ کے دوران قرضوں میں13ہزار 78ارب رو پے کا اضافہ ریکارڈ کیا گیا،اسٹیٹ بینک نے قرضوں کے بارے میں تفصیلات جاری کردیں۔اسٹیٹ بینک کی دستاویزات کے مطابق موجودہ حکومت کے پہلے 16ماہ میں قرضوں میں 13ہزار 78ارب رو پے کا اضافہ ریکارڈ کیا گیا۔
وفاقی حکومت کے قرضوں میں یہ اضافہ مارچ 2024ء سے لے کرجون 2025ء کے دوران ہوا، اسی عرصے میں وفاقی حکومت کا مقامی قرضہ11ہزار 796ارب روپے بڑھا۔دستاویز کے مطابق وفاقی حکومت کے بیرونی قرضے میں 1282ارب رو پے کا اضافہ ہوا جبکہ وفاقی حکومت کا قرضہ جون 2025ء تک77ہزار 888ارب روپے رہا۔ دستاویز میں بتایا گیا ہے کہ فروری2024ء تک وفاقی حکومت کے قرضے 64ہزار810ارب روپے تھے۔
فروری 2024ء تک مرکزی حکومت کا مقامی قرضہ42ہزار 675ارب روپے تھا۔ جون 2025تک مرکزی حکومت کا مقامی قرضہ 54ہزار 471ارب روپے ریکارڈ ہوا جبکہ فروری2024ء تک وفاقی حکومت کا بیرونی قرضہ22ہزار 134ارب روپے تھا۔ جون2025ء تک مرکزی حکومت کا بیرونی قرضہ 23ہزار417ارب روپے رہا
جبکہ پاکستان پر جون 2025ء تک قرضے اور واجبات 94ہزار 197ارب کی سطح پر پہنچ چکے تھے۔مالی سال 2024۔25ء میں پاکستان پر قرضوں اور واجبات میں 8ہزار740ارب روپے کا اضافہ ہوا۔
