اسلام آباد:وزیرمملکت برائے پیٹرولیم علی پرویز ملک نے کہا ہے کہ پاکستان کے تیل و گیس کے ذخائر سرمایہ کاری، ترقی اور خودمختاری کی ضمانت ہیں۔
انہوں نے مزیدکہاکہ پاکستان کے پاس ایک ہزار 234ملین بیرل تیل کے ذخائر موجود ہیں، تیل کی بروقت ایکسپلوریشن سے معاشی اہمیت محفوظ، بیرونی انحصار کم اور خودمختاری میں اضافہ ممکن ہے۔ ایس آئی ایف سی کی معاونت سے تیل کی بروقت ایکسپلوریشن کے لیے کوششوں میں نمایاں تیزی آئی ہے۔
اپنے ایک بیان میں وزیرمملکت پیٹرولیم نے کہا ہے کہ آئندہ دہائی کے دوران30-25 ارب ڈالر سرمایہ کاری سے 10 فیصد ذخائر کا استعمال ممکن ہو گا۔ انہوں نے کہا کہ تیل کا سالانہ درآمدی بل 12 ارب ڈالر ہے تاہم مقامی پیداوار میں اضافہ سے پاکستان کی توانائی خود کفالت کا نیا دور ششروع ہو گا۔
وزیر مملکت نے کہاکہ امریکا اورپاکستان آئل پارٹنرشپ ، روشن معیشت اور مضبوط مستقبل کی ضمانت ہے۔ترکی کے ساتھ 40 آف شور بلاکس پر معاہدہ بھی ملکی توانائی تحفظ کے لیے گیم چینجر ثابت ہو گا۔
