وفاقی حکومت کا فیڈرل کانسٹیبلری ہیڈکوارٹر کو پشاور سے اسلام آباد منتقل کرنے کا فیصلہ

اسلام آباد : وفاقی حکومت نے فیڈرل کانسٹیبلری کے ہیڈکوارٹر کو پشاور سے وفاقی دارالحکومت اسلام آباد منتقل کرنے کا اصولی فیصلہ کر لیا ہے۔
اس ضمن میں وفاقی وزیر داخلہ محسن نقوی نے نئے ہیڈکوارٹر کے لیے موزوں اراضی کی فوری نشاندہی کی ہدایت جاری کر دی ہے۔ اس اقدام کا مقصد فورس کو جدید خطوط پر استوار کرنا اور اس کی صلاحیتوں کو مؤثر انداز میں بروئے کار لانا ہے۔
وفاقی وزیر داخلہ کے زیر صدارت سی ڈی اے ہیڈکوارٹر اسلام آباد میں ایک اہم اجلاس منعقد ہوا جس میں وزیر مملکت برائے داخلہ طلال چوہدری، وفاقی سیکرٹری داخلہ، کمانڈنٹ و ڈپٹی کمانڈنٹ فیڈرل کانسٹیبلری، چیئرمین سی ڈی اے، آئی جی اسلام آباد پولیس، ڈپٹی کمشنر اسلام آباد اور دیگر اعلیٰ حکام نے شرکت کی۔
اجلاس میں نئے ہیڈکوارٹرز کے لیے ماسٹر پلان طلب کرتے ہوئے ہدایت دی گئی کہ اراضی کی نشاندہی کرتے وقت ہیڈکوارٹرز کے ساتھ ساتھ ٹریننگ سہولیات کی ضروریات کو بھی خاص طور پر مد نظر رکھا جائے۔ اس موقع پر محسن نقوی نے کہا کہ فیڈرل کانسٹیبلری کو جدید بنیادوں پر منظم اور ایک انتہائی فعال فورس بنانے کا عزم رکھتے ہیں، اور اس منتقلی سے فورس کی استعداد کار میں نمایاں اضافہ ممکن ہوگا۔