وزیراعلیٰ پنجاب مریم نواز شریف نے گجرات میں سیلابی پانی کی نکاسی کے عمل میں تیزی آنے پر اظہار اطمینان کیا ہے۔اپنے بیان میں وزیراعلیٰ پنجاب مریم نواز شریف کا کہنا ہے کہ اللہ تعالیٰ کا شکر ہے کہ گجرات میں سیلابی پانی کی سطح میں تیزی سے کمی آ رہی ہے، فوارہ چوک کلیئر ہوچکا ہے، الحمدللہ گجرات شہر میں صورتحال تیزی سے بہتری کی طرف گامزن ہے، جلد شہری اس مشکل سے مکمل نجات پائیں گے صرف ایک دن میں سیلابی پانی کی سطح میں دو فٹ کمی آنا آپریشن کی کامیابی کی علامت ہے ۔
انہوں نے پوری ٹیم کو شاباش دی اور متعلقہ صوبائی سیکرٹریز، افسران اور عملے کی کاوشوں کی تحسین کی ہے۔مریم نواز شریف کو بریفنگ میں بتایا گیا کہ سیلابی پانی کا بہاؤ موڑنے کیلئے لورائی کے مقام پر کام جاری ہے، مزید بارش یا پانی کے دباؤ میں اضافے کی صورت میں لورائی کو محفوظ اور مضبوط کرنے کیلئے مناسب افرادی قوت اور سامان موجود ہے۔
ادھر وزیراعلیٰ پنجاب مریم نواز شریف نے گجرات میں سیلاب کی صورتحال پر ہنگامی اقدامات اٹھاتے ہوئے پنجاب کے پانچ بڑے شہروں کی واسا کی مشینری گجرات پہنچا دی۔ وزیراعلیٰ مریم نواز شریف کے حکم پر ہاؤسنگ، کمیونیکیشن، ورکس، لوکل گورنمنٹ اور اریگیشن کے صوبائی سیکرٹری گجرات پہنچ گئے ۔
ہنگامی اقدامات پر موثر عملدرآمد کرنے اور صورتحال ٹھیک ہونے تک گجرات میں رہنے کا حکم دیا گیاہے۔آئندہ دو روز میں مزید مشینری گجرات پہنچ جائے گی۔گجرات میں سیلابی پانی کے نکاسی کے ہنگامی ایکشن پلان پر چوبیس گھنٹے کام ہوگا- گجرات میں نکاسی آب اور سیوریج کے جدید نظام کے لیے پہلے سے منظور شدہ 21ارب روپے کے پیکیج پر بلاتاخیر عملدرآمد شروع کرنے کا بھی فیصلہ کیاگیاہے۔
منصوبے کے تحت مستقبل میں نکاسی آب کا جدید انفراسٹرکچر تعمیر ہوگا-انجینئرنگ کے جدید خطوط پر سیلابی نالوں کا پورا نظام بنے گا ،ایک ہفتے میں گجرات واسا کے نئے قائم ہونے والے ادارے کو بھاری مشینری فراہم کر دی جائے گی۔گجرات میں نکاسی آب اور شہریوں کی مدد کے لئے 83ٹیکنیکل مہارت رکھنے والے عملے کی بھی ہنگامی بنیادوں پر تعیناتی کردی گئی ہے-نکاسی آب کے 26اورپینے کے پانی کی فراہمی کے 24مزید پمپ بھی گجرات پہنچا دیے گئے۔
لورین کے مقام سے سیلابی پانی گجرات شہر میں داخل ہو رہا ہے، بھمبر کی طرف جاتے چھوٹے چھوٹے پانی کے بہاؤ سے اس کی مقدار بڑھ رہی ہے-نالہ کھود کر 20فیصد پانی کا رخ موڑنے کا آپریشن جاری ہے، 80 فیصد پانی اب بھی شہر کی طرف جا رہا ہے۔مشینری اور عملے کی مدد سے ہلسی نالے کی طرف جانے والی نالی کی گنجائش بڑھانے کی کوشش بھی جاری ہے۔سیلابی پانی کا رخ موڑنے کے لیے 5پمپس بھی نصب کیے جا رہے ہیں۔
گرین ٹاؤن، مکی محلہ، کالرا کلاں، ریلوے روڈ اورپدھی کالونی کی صفائی ستھرائی کا آپریشن مکمل کر لیا گیا۔وزیراعلیٰ مریم نواز شریف نے ڈسپوزل اسٹیشن کی موثر کارکردگی کی تعریف کی، جس نے ان علاقوں کی کلیئرنس کو یقینی بنایاہے۔
