وزیراعلیٰ پنجاب مریم نواز نے کہا ہے کہ صوبے کو سپر فلڈ کا سامنا ہے تاہم بروقت اور بہترین انتظامات سے ہزاروں انسانی جانیں محفوظ ہوگئیں۔ وزیراعلی پنجاب نے صوبائی ڈیزاسٹر منیجمنٹ اتھارٹی (پی ڈی ایم اے)کو متوقع حالات کے پیش نظر بھرپور بیک اپ تیاری کا حکم دے دیا۔مریم نواز نے سیلاب کی غیر معمولی صورتحال کے پیش نظر انتظامیہ اور تمام متعلقہ اداروں کو بدستور متحرک رہنے کی ہدایت کر دی اور ساتھ ہی ہیلتھ کیمپ میں تمام ادویات کی فراہمی یقینی بنانے کی بھی ہدایت کی۔
علاوہ ازیں، مریم نواز نے بارش کے پانی سے پیدا ہونے والی بیماریوں کے علاج کے لیے انتظامات اور ادویات کی فراہمی اور سیلاب زدہ علاقوں کے ریلیف کیمپوں میں خواتین کے لئے سینٹری کٹ مہیا کرنے کی ہدایت کر دی۔وزیراعلی نے کلینک آن ویل، فیلڈ ہسپتال اور مدراینڈ چائلڈ کلینک آن ویل کی سروسز مزید تیز کرنے اور سیلاب زدہ علاقوں میں قائم ریلیف میڈیکل کیمپوں میں بہتری کی بھی ہدایت کردی۔
اس موقع پر ان کا کہنا تھا کہ پنجاب کو سپر فلڈ کا سامنا ہے، بروقت اور بہترین انتظامات سے ہزاروں انسانی جانیں محفوظ ہوگئیں صوبے میں سیلاب سے پیشتر بروقت انخلا سے ڈھائی لاکھ لوگ محفوظ رہیں جبکہ آبی ریلوں میں گھرے 9 لاکھ سے زائد متاثرین کو بروقت ریسکیو کر لیا گیا۔انہوں نے کہا کہ پنجاب میں تاریخ کا سب سے بڑا انخلا اور ریسکیو آپریشن کیا گیا، انتظامیہ اور تمام اداروں کی منظم کاوشوں سے تباہی سے محفوظ رہے، سیلاب متاثرین ہمارے مہمان ہیں، کھانے پینے اور دیگر انتظامات میں کوئی کوتاہی برادشت نہیں کی جائے گی۔
مریم نواز شریف کا کہنا تھا کہ پنجاب سیلاب کی حساس ترین صورتحال سے گزررہا ہے لیکن حکومتی ادارے مستعد ہیں، کمشنر، ڈپٹی کمشنر، اسسٹنٹ کمشنر، پولیس، ریسکیو 1122، سول ڈیفنس اور دیگر تمام اداروں کو ہمہ وقت تیار رہنا ہوگا۔ادھر فلڈ ریلیف کیمپوں میں ہزاروں سیلاب متاثرین کے لئے صبح ،دوپہر اورشام کے کھانے کا اہتمام کیاجارہا ہے۔وزیر اعلیٰ مریم نواز شریف سیلاب متاثرہ علاقوں میں قائم فلڈریلیف کیمپ میں کھانے کی فراہمی پر رپورٹ لیتی رہیں۔ صوبائی وزراء ، ڈپٹی کمشنر، اسسٹنٹ کمشنر خود جاکر سیلاب متاثرین کو کھانا پیش کررہے ہیں۔
وزیراعلیٰ مریم نواز شریف کی ہدایت پر صوبہ بھر میں سیلاب متاثرین کو خشک راشن کی فراہمی کا بھی آغاز کر دیا گیا ہے۔ ریسکیو ٹیمیں بوٹس پر جاکرسیلاب متاثرہ علاقوں میں گھر گھر کھانا مہیا کرنے میںمصروف ہیں۔ سیلاب متاثرہ علاقوں میں گھر وںمیں مقیم ہزاروں خاندانوں کو کھانا بھی پہنچایا جارہا ہے۔ وزیراعلیٰ مریم نواز شریف نے ہدایت کی کہ ریسکیو ٹیم کو ہر جگہ پہنچنا چاہیے ،کوئی سیلاب سے متاثرہ فرد کھانے سے محروم نہ رہے۔ پاکپتن ، خانیوال کے فاضل شاہ اور دیگر علاقوں کے فلڈ کیمپوں میںمقیم سیلاب متاثرہ خاندانوں کے لئے عمدہ ناشتے کا اہتمام بھی کیا جارہا ہے۔
ساہیوال کے ریلیف کیمپوں میں کھانا اور متاثرہ علاقوں میں راشن کی فراہمی جاری ہے۔ بورے والااور دیگر سیلاب متاثرہ علاقوں میں مویشیوں کے لئے چارے کی فراہمی بھی جاری ہے۔ بہاولنگر کے دریائے بیلٹ کی تمام تحصیلوں کے متاثرہ علاقوں میں کھانا اور خشک راشن تقسیم کیا جارہا ہے۔ تحصیل شجاع آباد کے فلڈریلیف کیمپوں میں سیلاب متاثرہ خاندانوں کے کم سن بچوں کو دودھ فراہم کیا جارہا ہے۔ کبیروالا کے سیلاب متاثرہ علاقوں میں راشن کی فراہمی اور متاثرہ خاندانوں کو کھانا بھی مہیا کیا جارہا ہے۔
