کوئٹہ:کوئٹہ میں پچھلے ایک ہفتے کے دوران سوئی گیس لیکج کے باعث ہونے والے دھماکوں میں اضافہ ہوگیا جس کی وجہ سے 7 روز کے دوران 8 افراد جاں بحق ہوگئے۔
کوئٹہ کے سول اسپتال کے برن وارڈ کے انچارج ڈاکٹر منظور نے بتایا کہ کوئٹہ کے سول اسپتال میں سوئی گیس دھماکوں کے زخمیوں کی تعدا د میں اضافہ ہوگیا ہے۔انہوں نے بتایا کہ پچھلے 48گھنٹوں کے دوران 37 زخمی افراد اسپتال لائے گئے ہیں۔
اسپتال میں داخل بیشتر زخمی 90 فیصد جھلسے ہوئے ہیں، زخمیوں کی بڑی تعداد میں آمد کے باعث سول اسپتال کے برن وارڈ میں مزید مریضوں کیلئے گنجائش کم رہ گئی ہے۔
ڈاکٹر منظور نے مزید بتایا کہ ایک ہفتے کے دوران سوئی گیس لیکج دھماکوں میں 105افراد زخمی ہوئے اور 8 اموات بھی ہوچکی ہیں۔دوسری جانب شہریوں کا کہنا ہے کہ گیس لیکج دھماکوں کی بڑی وجہ سوئی سدرن گیس کمپنی کی جانب سے شہر میں سوئی گیس کی لوڈمنیجمنٹ ہے۔
