امریکی صدر ڈونلڈ ٹرمپ اور سعودی ولی عہد شہزادہ محمد بن سلمان کے درمیان ٹیلی فونک رابطہ ہوا ہے۔
غیرملکی میڈیا کے مطابق بات چیت میں سعودی عرب نے امریکا کے ساتھ اپنے اقتصادی تعلقات کو مزید مضبوط کرنے اور امریکا میں سرمایہ کاری کو 600 ارب ڈالر تک بڑھانے کی خواہش کا اظہار کیا۔ ولی عہد شہزادہ محمد بن سلمان نے کہا کہ سعودی عرب شراکت داری اور سرمایہ کاری کے مواقع میں حصہ لینے کے لیے پرعزم ہے۔ انہوں نے کہا کہ ان کا ملک امریکا کے ساتھ مختلف شعبوں میں تعاون کو مزید فروغ دینا چاہتا ہے تاکہ دونوں ممالک کے تعلقات میں مزید استحکام پیدا ہو۔
ٹیلی فونک بات چیت کے دوران دونوں رہنماؤں نے مشرق وسطیٰ میں امن، سلامتی اور استحکام کے فروغ کے لیے تعاون کے مختلف پہلوؤں پر تبادلہ خیال کیا۔ اس کے علاوہ دہشت گردی کے خلاف دو طرفہ تعاون کو بھی مزید مستحکم کرنے پر گفتگو ہوئی۔
یاد رہ کہ صدر ڈونلڈ ٹرمپ نے اپنی پہلی مدتِ صدارت کے دوران بھی پہلا غیرملکی دورہ سعودی عرب کا کیا تھا، جو دونوں ممالک کے قریبی تعلقات کا مظہر تھا۔ 2017ء میں اس دورے کے دوران دونوں ممالک کے درمیان 400 ارب ڈالر کی سرمایہ کاری کے معاہدوں پر دستخط ہوئے تھے۔ اس دورے میں صدر ٹرمپ کا شاندار استقبال کیا گیا تھا اور انہیں سعودی عرب کے اعلی ترین اعزاز ‘عبدالعزیز السعود’ سے نوازا گیا تھا، جو سعودی عرب کی طرف سے کسی غیرملکی رہنما کے لیے احترام کا ایک اعلیٰ مظہر ہے۔
حالیہ گفتگو اس بات کا اشارہ دیتی ہے کہ سعودی عرب اور امریکا کے درمیان تعلقات میں مزید بہتری کے امکانات موجود ہیں، خاص طور پر اقتصادی اور سکیورٹی کے شعبوں میں۔ دونوں ممالک نے ہمیشہ عالمی مسائل کے حل کے لیے قریبی تعاون کو ترجیح دی ہے۔
