سی پیک کوریڈور کے تحت تعمیر کیے گئے نیو گوادر انٹرنیشنل ایئرپورٹ کا باقاعدہ افتتاح کر دیا گیا ہے، جہاں کراچی سے قومی ایئرلائن کی پہلی پرواز پی کے 503 نے لینڈ کیا۔
افتتاحی تقریب میں گورنر بلوچستان شیخ جعفر خان مندوخیل، وزیرِ اعلیٰ بلوچستان سرفراز بگٹی، وفاقی وزیر خواجہ آصف اور چین کی اہم شخصیات نے شرکت کی اور ایئر پورٹ پر پہنچنے والے مسافروں کا پرتپاک استقبال کیا۔
کراچی سے روانہ ہونے والی پرواز پی کے 503 کو نیو گوادر ایئرپورٹ پر اترنے پر واٹر سلیوٹ دیا گیا۔ یہ پرواز 45 منٹ کی تاخیر سے صبح 10 بجے روانہ ہوئی اور 11 بج کر 11 منٹ پر گوادر ایئرپورٹ پر لینڈ کرگئی۔ پرواز کے لیے قومی ایئرلائن نے سابق اے ٹی آر طیارہ استعمال کیا۔
نیو گوادر انٹرنیشنل ایئرپورٹ پاکستان کا سب سے بڑا ایئرپورٹ ہے، جو 430 ایکڑ رقبے پر گوادر شہر سے 26 کلومیٹر دور گورنڈانی کے مقام پر تعمیر کیا گیا ہے۔ ایئر پورٹ کا رن وے 3658 میٹر طویل اور 75 میٹر چوڑا ہے، جو ایئر بس اے 380 اور بوئنگ 747 جیسے بڑے طیارے بھی ایڈجسٹ کر سکتا ہے۔ ایئرپورٹ کی تعمیر پر تقریباً 50 ارب روپے لاگت آئی ہے۔
نیو گوادر ایئر پورٹ کا علامتی افتتاح 14 اکتوبر 2024ء کو وزیرِ اعظم شہباز شریف نے کیا تھا۔ تاہم، آج سے ایئر پورٹ پر پروازوں کی باقاعدہ لینڈنگ اور فلائٹ آپریشنز کا آغاز کر دیا گیا ہے۔فلائٹ ریڈار پر نیو گوادر ایئرپورٹ کو باقاعدہ ٹیگ کر دیا گیا ہے، جبکہ پرانے گوادر ایئرپورٹ کے مقام سے ٹیگ ہٹا دیا گیا ہے، جس سے ایئرپورٹ کے فعال ہونے کی تصدیق ہو گئی ہے۔
یاد رہے کہ نیو گوادر انٹرنیشنل ایئ پورٹ کی افتتاحی تقریب اور پہلی پرواز کی آمد کو سی پیک منصوبے کے تحت پاکستان کی ترقی کی جانب ایک اہم قدم قرار دیا جا رہا ہے۔
