اسلام آباد: ایشیائی ترقیاتی بینک نے پاکستان میں گزشتہ سال آنیوالے تباہ کن سیلاب سے متاثرہ افراد اورعلاقوں کی بحالی اورتعمیرنو کیلیے تعاون جاری رکھنے کے عزم کااعادہ کیا ہے۔
ایشیائی ترقیاتی بینک کی جانب سے جاری بیان میں کہا گیا ہے کہ ایک سال قبل آنے والے بدترین سیلاب سے پاکستان میں 33ملین لوگ متاثر ہو گئے تھے۔ ایشیائی ترقیاتی بینک بحالی اورماحولیاتی موزونیت کے مختلف منصوبوں میں 554 ملین ڈالرکی معاونت فراہم کررہاہے۔
بیان میں بتایا گیا ہے کہ متاثرہ علاقوں میں پلوں، واٹرسپلائی، ضروری نہروں اورکھالوں میں پانی کی فراہمی، زراعت اورلائیواسٹاک کے شعبہ جات میں پاکستان کوامدادفراہم کررہاہے۔
بیان کے مطابق بلوچستان کے 60 ہزارکسانوں میں چاولوں کی بیج کی فراہمی ایف اے اوکے تعاون سے عمل میں لائی گئی ہے جس کیلیے جاپان کی حکومت نے مالی معاونت فراہم کی ہے۔اسی طرح خواتین کسانوں کوٹول کٹس اورحفاظتی فٹ وئیرز کی فراہمی بھی کی جارہی ہے۔
