پاکستان تحریک انصاف کے چیئر مین اور سابق وزیراعظم عمران خان نے کہا ہے کہ ہم ہرگز نہیں جھکیں گے کیونکہ ہم بھیڑ بکریاں نہیں، اقتدار میں بیٹھے مجرموں نے جلاؤ گھیراؤ میں ملوث افراد کی نشاندہی کی آڑ میں کارکنان، سپورٹرز کی زباں بندی اور دبانے کیلئے فسطائی حربوں کا سہارا لیا ہے۔
سماجی رابطے کی ویب سائٹ ٹویٹر پر اپنے ایک بیان میں پی ٹی آئی کے چیئر مین نے لکھا کہ اس بدترین کریک ڈاؤن اور ملک میں قائم دہشت کے اس راج، جسکی زد میں تحریک انصاف اور اس کے سپورٹرز ہیں اور جس کا مظاہرہ تو پرویز مشرف اور جنرل (ر) ضیاء الحق کے مارشل لاء ادوار میں بھی نہ کیا گیا، کے پیچھے یہ ذہنیت کارفرما ہے کہ ہم اہلِ پاکستان بھیڑوں کا ریوڑ ہیں جنہیں با آسانی خوفزدہ کرکے طاقت کی ننگی نمائش کے آگے جھکایا جاسکتا ہے۔
اپنے ایک اور بیان میں انہوں نے لکھا کہ وہ تو ٹھیک ہے، مگر ہم ہرگز نہیں جھکیں گے کیونکہ اوّل تو ہم بھیڑ بکریاں نہیں، انسان ہیں اور دوم یہ کہ ہم تاریخِ عالم کے عظیم ترین قائد (محمد الرسول اللہ صلی اللہ علیہ وسلم) کی امت ہیں جنہوں نے ہمیں رب العزّت کے حضور اس عہد میں باندھا کہ خالقِ کائنات کے سوا ہم کسی کے بھی سامنے ہرگز نہیں جھکیں گے۔ ریاستی بربریت کے مزید شواہد سامنے آرہے ہیں۔
سابق وزیراعظم نے لکھا کہ اقتدار میں بیٹھے مجرموں نے جلاؤ گھیراؤ میں ملوث افراد کی نشاندہی کی آڑ میں تحریک انصاف کے کارکنان اور سپورٹرز کی زباں بندی اور انہیں دبانے کیلئے فسطائی حربوں کا سہارا لیا ہے۔
عمران خان کا کہنا تھا کہ خوف و دہشت کے فروغ کی ایک سوچی سمجھی مہم میں خواتین اور بچوں تک کو نہیں بخشا گیا۔
