پاکستان تحریک انصاف کی ایک اور وکٹ گر گئی، سابق وفاقی وزیر ملک امین اسلم نے بھی پی ٹی آئی چھوڑنے کا فیصلہ کرلیا۔
پاکستان تحریک انصاف کی جانب سے 9 مئی کو عمران خان کی گرفتاری پر پرتشدد احتجاج کی پالیسی کے بعد پی ٹی آئی کو ایک اور دھچکا لگ گیا، وزیراعظم کے مشیر برائے موسمیاتی تبدیلی ملک امین اسلم نے بھی پارٹی چھوڑنے کا اعلان کردیا۔
ایک نجی اخباری ذرایع نے سابق وفاقی وزیر امین اسلم سے سوال کیا کہ کیا آپ پاکستان تحریک انصاف چھوڑ رہے ہیں؟، جس پر انہوں نے مختصر تاہم واضح جواب دیتے ہوئے کہا کہ جی ہاں، میں پارٹی چھوڑ رہا ہوں۔
واضح رہے کہ ملک امین اسلم اٹک سے پاکستان تحریک انصاف کے ٹکٹ پر الیکشن لڑے تھے وہ بلین ٹری منصوبے کے سربراہ اور امین اسلم وزیراعظم کے مشیر برائے موسمیاتی تبدیلی بھی رہ چکے ہیں۔
ملک امین اسلم پریس کانفرنس میں پاکستان تحریک انصاف چھوڑنے کی وجوہات بتائیں گے، وہ پی ٹی آئی کور کمیٹی کے رکن بھی ہیں۔
دوسری جانب پاکستان تحریک انصاف کور کمیٹی کے ایک اور رکن ڈاکٹر امجد نے بھی پارٹی چھوڑنے کا فیصلہ کرلیا، وہ آج شام ساتھیوں سمیت باضابطہ اعلان کریں گے۔
