کوئٹہ:چمن پھاٹک کے قریب شٹل ٹرین کے گزرتے وقت زوردار دھماکے کے باعث اب تک ایف سی اہلکاروں سمیت 14 افراد شہید ہوگئے جبکہ درجنوں افراد زخمی ہیں، دھماکے سے ٹرین کی متعدد بوگیاں پٹڑی سے اتر گئیں۔دھماکا اتنا شدید تھا کہ آواز شہر بھر میں سنی گئی جبکہ قرب و جوار میں عمارتوں کے شیشے ٹوٹ گئے۔
ریلوے حکام کے مطابق کوئٹہ کینٹ سے آنے والی شٹل ٹرین چمن پھاٹک کے قریب دھماکے کی زد میں آئی، جس کے نتیجے میں انجن سمیت تین کوچز پٹڑی سے اتر گئیں۔عینی شاہدین کا کہنا ہے کہ پھاٹک کے قریب پہلے سے ایک گاڑی کھڑی ہوئی تھی لیکن جیسے ہی ٹرین پھاٹک کے قریب پہنچی تو اس دوران دھماکا ہوگیا جس کے باعث ٹرین کے انجن کو بھی شدید نقصان پہنچا۔
معاون وزیر اعلی بلوچستان شاہد رند کے مطابق دھماکے میں شہادتوں کی تعداد 14 ہوگئی، شہدا میں ایف سی کے 3 جوان بھی شامل ہیں۔ زخمیوں کو اسپتال منتقل کر دیا گیا۔شاہد رند کا کہنا تھا کہ دہشت گردوں نے نہتے شہریوں کو نشانہ بنایا، حملہ امن دشمن عناصر کی بزدلانہ کارروائی ہے، عوامی مقامات کو نشانہ بنانا دہشت گردوں کی بوکھلاہٹ کا ثبوت ہے، شہدا کی قربانی رائیگاں نہیں جائے گی۔
سول اسپتال ٹراما سینٹر میں ایمرجنسی نافذ کر دی گئی، زخمیوں میں خواتین اور بچے بھی شامل ہیں جنہیں اسپتال منتقل کر دیا گیا۔ریلوے حکام کے مطابق دھماکا جعفر ایکسپریس ٹرین گزرتے وقت ہوا ہے، ٹرین میں سوار مسافر عید کے چھٹیاں منانے اپنے گھروں کو جا رہے تھے۔
سیکیورٹی فورسز نے فوری طور پر علاقے کو گھیرے میں لے کر ریسکیو آپریشن شروع کر دیا، امدادی کارروائیوں کے لیے ریسکیو ٹرک اور ریلیف ٹرین جائے وقوعہ پر روانہ کر دی گئیں۔ دھماکے کے بعد جائے وقوعہ پر آگ بھی لگی، فائر بریگیڈ کے عملے آگ بجھا دی۔
معاون خصوصی برائے داخلہ بلوچستان بابر یوسفزئی کا کہنا تھا کہ واقعے کی معلومات حاصل کر رہے ہیں، جیسے ہی مزید تفصیلات ملیں گی میڈیا کو آگاہ کیا جائے گا، تمام متعلقہ اداروں کو الرٹ کر دیا گیا ہے تاہم عوام سے اپیل ہے وقوعہ جائے کے قریب جمع نہ ہوں۔
وزیراعظم شہباز شریف، صدر مملکت آصف علی زرداری، وفاقی وزیر برائے سائنس و ٹیکنالوجی، چیئرپرسن بے نظیر انکم سپورٹ پروگرام سینیٹر روبینہ خالد، وزیراعلی خیبرپختونخوا محمد سہیل آفریدی، گورنر کے پی فیصل کریم کنڈی سمیت دیگر وزرا اور سیاسی رہنماوں نے دھماکے کی مذمت کی۔
وفاقی وزیر ریلوے محمد حنیف عباسی نے کوئٹہ میں ہونے والے دھماکے کی شدید مذمت کرتے ہوئے کہا ہے کہ واقعہ بزدلانہ دہشت گردی، ایسے حملے قومی عزم کو کمزور نہیں کر سکتے۔محمد حنیف عباسی نے کہا کہ بھارت اور افغانستان میں موجود پاکستان دشمن عناصر دہشت گردی کی سرپرستی کر رہے ہیں، بھارت اور افغانستان سے چلنے والے دہشت گرد نیٹ ورکس کے ناپاک عزائم کبھی کامیاب نہیں ہونے دیے جائیں گے۔ دہشت گرد انسانیت اور ملک کے دشمن ہیں اور انہیں عبرتناک انجام تک پہنچایا جائے گا۔
وزیر ریلوے نے کہا کہ پاکستان ریلوے کی آپریشنل سرگرمیاں بلا تعطل جاری رہیں گی۔ انہوں نے انتظامیہ کو واقعے کی فوری رپورٹ پیش کرنے کی ہدایت کر دی۔وزیراعلی بلوچستان میر سرفراز بگٹی نے دھماکے کی مذمت کرتے ہوئے کہا کہ فتن الہندوستان کے دہشت گرد معصوم شہریوں کو نشانہ بنا کر درندگی کا ثبوت دے رہے ہیں، ے گناہ شہریوں کا خون بہانے والے دہشت گرد کسی رعایت کے مستحق نہیں۔
