آصف زرداری کی وکٹ اڑانے کیلیے خاص سوئنگ سیکھی ہے، عمران خان

کراچی: پاکستان تحریک انصاف کے چیرمین عمران خان نے کہا ہے کہ آصف زرداری کی وکٹ اڑانے کے لیے خاص سوئنگ سیکھ لی ہے اور اب ان کی وکٹ گرنے میں زیادہ دیر نہیں۔

کراچی میں میڈیا کے نمائندوں سے گفتگو کرتے ہوئے پی ٹی آئی کے چیرمین عمران خان نے کہا کہ عائشہ گلالئی کیس میں الیکشن کمیشن کا فیصلہ آئین کے خلاف ہے، ہم اس معاملے کو دیکھ رہے ہیں، گلالئی نے خود پارٹی چھوڑنے کا اعلان کیا اور اصولوں کی خلاف ورزی کی، امید کرتے ہیں کہ الیکشن کمیشن ایسے فیصلے کرے گا جو تحریک انصاف کے خلاف نہ ہوں۔

عمران خان نے مزید کہا کہ پاکستان نے جتنا ڈومور کرنا تھا کرلیا، امریکا کی جنگ میں پاکستان نے جتنی قربانی دی اتنا تو کوئی سوچ بھی نہیں سکتا، ڈو مور کرتے کرتے ہم نے اپنے ہے قبائلی علاقوں کو اجاڑ لیا اور انتہا پسندی بھی بڑھ گئی۔

چیرمین تحریک انصاف کا کہنا تھا کہ شرجیل میمن کے خلاف کارروائی خوش آئند ہے، آصف زرداری کی وکٹ اڑانے کے لیے خاص سوئنگ سیکھ لی ہے، مجھے ان کی مڈل اسٹمپ صاف نظر آرہی ہے اور اب ان کی وکٹ گرنے میں زیادہ دیر نہیں، عوام کا پیسہ عوام پر خرچ ہوتا تو آج سندھ کا یہ حال نہ ہوتا، زرداری مافیا نے تو گنے کے کاشت کاروں سے بھی جینے کا حق چھین لیا ہے۔