نوازشریف کے پاس گھرجانے کے سوا کوئی راستہ نہیں، عمران خان

پشاور: چئیرمین تحریک انصاف عمران خان کا کہنا ہے کہ نوازشریف پاناماکیس میں بری طرح پھنس چکے ہیں اب ان کے پاس گھر جانے کے علاوہ کوئی راستہ نہیں بچا۔

وزیراعلیٰ ہاؤس پشاورمیں پارٹی عہدیداوں سے خطاب کرتے ہوئے عمران خان کا کہنا تھا کہ سپریم کورٹ میں وزیراعظم نوازشریف کی جانب سے قطری خط پیش کیا گیا جو عدالت عظمیٰ نے مسترد کردیا اب کیس ختم ہوچکا اور نوازشریف پاناماکیس میں بری طرح پھنس چکے ہیں ان کے پاس گھرجانے کے علاوہ کوئی راستہ نہیں۔ ان کا کہنا تھا کہ آئندہ جمعے کے روز عوام کو وزیراعظم کے خلاف گھروں سے نکلنا ہوگا اب گول ڈی تک پہنچ چکا ہے اور ایک کک لگانی باقی ہے ہم عوام کی طاقت سے نوازشریف کو استعفیٰ پر مجبور کردیں گے۔

اس سے قبل پشاور کے حیات آباد اسپورٹس کمپلیکس میں تقریب سے خطاب کرتے ہوئے تحریک انصاف کے چئیرمین عمران خان کا کہنا تھا کہ جب ہمیں حکومت ملی تو صوبے میں افراتفری تھی، ادارے تباہی کی طرف جارہے تھے، کھیلوں کے میدان ویران ہوچکے تھے، امن و امان کی صورتحال انتہائی ناقص ہونے کی وجہ سے کوئی کام شروع کرنے سے پہلے 100 بار سوچنا پڑتا تھا لیکن نوجوانوں نے ہماری مدد کی۔ ہماری مسلسل جدوجہد کے بعد پورے ملک میں کرپشن کے خلاف تحریک چل چکی ہے اور آج ہم فخر سے کہہ سکتے ہیں تبدیلی آچکی ہے۔